ഭാര്യ മരിച്ചു രണ്ടാഴ്ച തികയുമ്പോൾ നൗഷാദും യാത്രയായി; നിർമാതാവും പാചക വിദഗ്ധനുമായ നൗഷാദ് അന്തരിച്ചു..!!
പാചക വിദഗ്ധനും സിനിമ നിർമാതാവുമായ കെ നൗഷാദ് അന്തരിച്ചു. അമ്പത്തിയഞ്ചാം വയസിൽ ആയിരുന്നു അന്ത്യം. ഉദര , നട്ടെല്ല് സംബന്ധിച്ച രോഗങ്ങൾക്ക് കഴിഞ്ഞ ഒരു വർഷമായി ചികിത്സയിൽ ആയിരുന്നു നൗഷാദ്.
തിരുവല്ല ആശുപത്രിയിൽ വെള്ളിയാഴ്ച രാവിലെ ആയിരുന്നു അന്ത്യം. രണ്ടാഴ്ച മുന്നേ ആയിരുന്നു ഹൃദയാഘാതം മൂലം ഭാര്യ മരിക്കുന്നത്. പ്രമുഖ കേറ്ററിങ് റസ്റ്ററന്റ് ശൃംഖലയായ ‘നൗഷാദ് ദ് ബിഗ് ഷെഫി’ന്റെ ഉടമയാണ്. മൂന്നു പതിറ്റാണ്ടായി പാചക രംഗത്തുള്ള നൗഷാദ് ആയിരക്കണക്കിന് വിവാഹങ്ങൾക്ക് ഭക്ഷണം ഒരുക്കിയിട്ടുണ്ട്.
തിരുവല്ലയിൽ റെസ്റ്റോറന്റും കേറ്ററിങ് സർവീസും നടത്തിയിരുന്ന പിതാവിൽ നിന്നാണ് നൗഷാദിന് പാചക വൈഭവം ലഭിച്ചത്. കോളജ് വിദ്യാഭ്യാസത്തിന് ശേഷം ഹോട്ടൽ മാനേജ്മെന്റ് പഠിച്ച നൗഷാദ് കേറ്ററിങ് ബിസിനസിൽ പുതിയ സാധ്യതകൾ കണ്ടെത്തുകയും വികസിപ്പിക്കുകയും ചെയ്തു.
ടെലിവിഷൻ പാചക പരിപാടികളിൽ അവതാരകനായിട്ടുണ്ട്. വലിയ ശരീര പ്രകൃതം കൊണ്ട് നൗഷാദ് ജനങ്ങളുടെ ശ്രദ്ധ ആകർഷിച്ചിരുന്നു. ബ്ലെസി എന്ന സംവിധായകനെ മലയാള സിനിമയ്ക്കു സമ്മാനിച്ച ‘കാഴ്ച’ എന്ന സിനിമയുടെ നിർമാതാവായിരുന്നു.
കൂളിയും കോളജിലും നൗഷാദിന്റെ സഹപാഠിയായിരുന്നു ബ്ലെസി. നിർമാണ രംഗത്ത് നൗഷാദിന്റെ ആദ്യ സംരംഭമായിരുന്നു കാഴ്ച. പിന്നീട് ചട്ടമ്പിനാട്, ബെസ്റ്റ് ആക്ടർ, ലയൺ, പയ്യൻസ്, സ്പാനിഷ് മസാല എന്നീ സിനിമകൾ കൂടി നിർമിച്ചു.